ပန်းပွင့်တွေရဲ့ဝေါ့လ်ဇ် (waltz of the flowers)
ဒီလိုညမျိုးမှာမှ ချိုင်ကော့ဗ်စကီးရဲ့
ပန်းပွင့်တွေရဲ့ဝေါ့လ်ဇ်ကို ဖွင့်မိလျက်သား ဖြစ်နေတော့
မြူငွေ့တွေကြားထဲ မင်းက
ဂါဝန်အနားစတွေကို ဝိုင်းကနဲ လှည့်လှည့်ပြီး
ကိုယ့်သံသရာဆီ တဖြည်းဖြည်း တိုးဝင်လာတာ
ပန်းပွင့်တွေသာ ဂီတသံတွေအဖြစ်နဲ့ ရှင်ပြန်ထမြောက်မယ်ဆို
မင်းဟာ ငှက်တောင်မွေးတစ်စလို
ဆွဲအားအထပ်ထပ်ကို ဖြတ်သန်းရှောင်ကွင်းပြီးမှ
ကမ္ဘာဆီ ရောက်ရှိလာရတဲ့ အလင်းမျှင်တန်းလို
ကာလတရားဟာ ကိုယ်တို့ကို ချောက်ချားစေနိုင်သလောက်
ဒီအဖြစ်ဟာ ကိုယ့်ကိုယ်ကိုယ်တောင် အံ့ဩရတဲ့ ဆန်းကြယ်မှုပဲ
ဒီလိုမျိုး ကိုယ်ဟာ အဲဒီအခိုက်အတန့်ကစပြီး
အရာရာကို အနှေးပြကွက်အနေနဲ့ပဲ မြင်တော့တာ
ရေတွေအကုန် လွှမ်းသွားပြီးရင် ဒီကမ္ဘာမှာ
ကိုယ်မပေးရသေးတဲ့ ပန်းပွင့်တွေပဲ တင်ကျန်ခဲ့မှာ
ပိုင်ဉာဏ်
14th February, 2023
Comments
Post a Comment