ပြေးလမ်း

"ဆူညံသံတွေကနေကင်းလွတ်အောင် ငါ့နားတွေကိုဖုံးကွယ်ထားလိုက်တယ်
ဘာတွေကြောင့်များ ငါတို့တစ်ယောက်ကိုတစ်ယောက် နာကျင်စေနေကြရတာ"
အလင်းရောင်ကျတာ မလုံလောက်ဘူး ဒီမှာ
အဖြူရောင်အမည်းရောင်ပုံရိပ်ယောင်
နေရာကနေ ထွက်ခွာဖို့ ဆိုက်ရောက်ဖို့
အဆင်သင့်ဖြစ်နေခဲ့တယ်
အရင်လိုလူသားဆန်တဲ့ အတွင်းသားပျောက်ဆုံးသွားပြီး
အပြင်ခွံသက်သက်ချည်းပဲကျန်ခဲ့ရင်တောင်
ငါတို့ဆက်ပြေးနေကြရ
အက်ရာတွေနဲ့မြို့ကို
အနွေးဓာတ်ကျတာ မလုံလောက်ဘူး
လမ်းတွေဆီ တဆက်တစပ်တည်းရောက်သွားပြီး
ကိုယ်တွင်းအစိတ်အပိုင်းတစ်ခုလိုမျိုး ။ ဒဏ်ရာမတွေ့တဲ့လွင်ပြင်ထဲ
ဇာတ်ဆောင် တစ် - နှစ် - သုံး - တစ်
ရာစုနှစ်များစွာကခရီးသွားရဲ့ ဓားမြောင်ရှည်ကို
နတ်ကွန်းထဲမှာ ရသွားတယ်
လက်ရှိငါကို အတိတ်ငါက အခါအားလျော်စွာ သတိပေးတားမြစ်ချက်
စက္ကူတွေ လေယာဉ်လိုဖြတ်ပျံသွားတော့
ငါ့နားတွေကို ဖုံးကွယ်ထားလိုက်တယ်
ကားရေဒီယိုကို ၉၃.၇ မဂ္ဂါဟက်ဇ် အက်ဖ်အမ် ပြောင်းကြည့်မိ
'All we are is dust in the wind' - သီချင်းစာသားတွေ လွင့်ကျလာ
မှန်သားကိုဖြတ်ပြီး စိုက်ဆင်းလာတယ်
အလင်းတွေတအားစူးလို့ ငါ့မျက်လုံးကို ဖုံးကွယ်ထားရတယ်
တိုက်ခိုက်မှုအပြီး ရှင်ကျန်သူတွေထဲမှာ
မင်းက ရှင်ကျန်မှုကိုယုံပြီး ငါက တိုက်ခိုက်မှုကိုယုံတာ
ပျက်ကျသွားတဲ့ ကိုးကွယ်စရာနတ်ကွန်းဟာ မီးခိုးတအူအူ
သန့်ရှင်းပြောင်လက်နေတဲ့လမ်းမဆီ တစ်ယောက်ချင်းရောက်သွားပြီး
ငါ့နာကျင်ရမှုကို ပန်းရောင်မီးခိုးမြူတွေက တတိတိ တိုက်စားသွား

    ပိုင်ဉာဏ်
    10th January, 2014